小辰光过立夏

上海老底子每天呈送精彩文章一组

打开尘封的记忆，寻觅往昔的岁月

叙上海老底子事 忆上海老底子人

诉上海老底子情

小辰光过立夏

侯宝良

“立夏”了，记忆里老早子到了立夏搿天早浪要吃蛋，中浪吃过中饭要“称人”，也就是称体重。至于具体有啥讲法，有啥典故，埃歇辰光年纪太小，呒没啥人来告诉阿拉，留辣记忆里嗰侪是开开心心白相做游戏。

记得当年阿拉屋里住辣弄堂里，立夏搿天早浪，邻居隔壁个小朋友侪会拿出红红绿绿个纱线来做蛋套。做好仔就拿烧熟个大鸭蛋套进去，一般就是咸蛋，挂辣头颈里晃来荡去，互相碰面还要比一比，啥人个蛋更加大。

蛋套哪能做呢？先拿根粗2毫米个线套辣自家头颈浪，两头挂到胸口合适个地方并起来打个结。再拿几根稍微细一点彩色纱线，多少根就看欢喜个网眼大小来定。每根线对折起来有三只半蛋个长短就可以，统统挂辣头颈里个粗线浪，然后开始用相邻个线互相打结组成环型，接头个高低可以用合适网眼大小个物事作标准，一般是2厘米个小木尺咾啥。一圈圈结下去，当结到可放得落一只蛋个辰光，就拿所有线头并辣一道打个大结，留下一把线头，剪齐刚好成为漂亮个彩须。

称人呢，从前看啥人分量重就说明“吃价”。到了现在标准就要倒过来了，啥人体重超标肯定坍招势，要减肥了。至于用啥秤，埃歇辰光体重秤只有医院里体检个地方有，普通人屋里肯定是呒没嗰，阿拉用个是米店、煤球店或者小菜场里个大磅秤。我屋里就住辣煤球店楼浪，阿奶是煤球店营业员，每年到了立夏，常常看到弄堂里个邻居带仔小囡来称体重，所以搿天店里邪气忙，除脱称煤球还要称人，相当热闹。听老人讲，从前乡下头称人用大杆秤，需要双手拉牢称钩，双脚离地。小囡力气小，拉勿牢称钩，就坐辣箩筐里，像称小猪猡一样。我听了笑得肚皮痛。

我印象比较深个邻居是“庄家伯伯”，伊是松江人，住辣对面弄堂里，体重足足200多斤。当年邻居侪讲伊“福相”。伊自家讲：“覅看我福嗒嗒，我走路吃力啊。”现在想想，当年大家吃得侪勿算好，有搿能个体重，大概是伊个身体出问题了。

现在我晓得立夏吃蛋、称人搿点习俗是从三国辰光传下来嗰，是老百姓为了图个“盼头”。吃蛋现在勿稀奇，可以天天吃，最好每天吃一两只，补充蛋白质。现在交关人家屋里侪有人体秤，称人也用勿着等到立夏。还有一种智能秤，勿但可以称体重，还可以测量身体里个脂肪含量，分析是勿是肥胖超重。所以现在到了立夏，或许还有人辣自家屋里安排小囡吃一只蛋、称一称体重，但是小辰光弄堂里个闹猛已经看勿见了。

原载2021年5月2日《新民晚报》

配图来源：网络

鸣谢：侯宝良先生赐稿分享！

原标题：《小辰光过立夏（作者：侯宝良）》

阅读原文