下载客户端

呒没一片草头，能逃离春天个餐桌

2021-04-02 17:31

来源：澎湃新闻·澎湃号·湃客

原创沈嘉禄海上梦叠

来源：文学报

作者：沈嘉禄

沪语改写：俞镝

沪语讲述：朱友好

推荐：丁迪蒙

编辑：王乙其

扑克牌里向个梅花，拨上海人叫作“草头”。发明扑克牌个威尼斯人要是晓得“凌寒独自开”个梅花成为了一道本帮饭店里向过老酒个小菜，会勿会气得胡子也翘起来了呢？

必过上海人并呒没恶作剧，梅花应该有五瓣，而扑克牌里只有三瓣。叫伊草头——就是苜蓿，理由邪气充分。草头个同类当中有三叶草，是爱尔兰个国花。但据说苜蓿当中难板可以看到四叶个，只不过十万枝苜蓿当中只有一枝是四叶个，老早子欧洲个小人经常会得白相一个野外游戏就是寻找四叶草，一旦寻着，好运就自然来了。

草头勒上海郊区又叫金花菜，因为草头开个花为金黄色。老法头里叫作“盘歧头”，因为苜蓿个叶子分叉老多个。

苜蓿来自于西域，西汉开始大面积种植。《史记·大宛列传》中就有搿方面个记载，一开始苜蓿就是用来喂马，或者当做土壤肥料个。汉武帝从大宛国获得了能够长途奔袭个“天马”后，军事力量大大提升，最终拿匈奴赶到了狼居胥山外头。

后来，勒中国种植个苜蓿一般分为紫苜蓿搭南苜蓿两种，紫苜蓿大多数长勒北方个田野里，至今还是家畜个饲料或者肥料。南苜蓿长勒长江以南，苏北人叫伊秧草，四、五月份，秧草是红烧河豚鱼个黄金搭档，据说秧草有解毒个功效，有秧草垫底，河豚就勿吓人了。本帮菜里向个生煸草头、草头圈子、草头春笋、草头乌参、草头河蚌、草头春笋咾啥，也是邪气出名个。

《淞南乐府》：“淞南好，斗酒饯春残。玉箸鱼鲜和韭煮，金花菜好入粞摊，蚕豆勿登盘。”老底子，上海城墙外个老百姓勒热天介拿收割个新麦挑进城里，供奉勒城隍老爷塑像前头表示感谢。立夏个中浪向要帮小人称份量，还流行吃草头摊粞、麦蚕、酒酿、樱桃咾啥。草头摊粞也叫草头塌饼，草头切碎，搭一定比例个大米粉、糯米粉拌匀，搓成直径两寸个小圆子，再用手掌心一揿成圆饼，油煎两面黄，外脆里软，充满着浓浓个乡味。

近枪把，我勒上海闵行搭江苏太仓吃到了勿一样个草头饼，马桥个草头饼大小搭厚薄就像月饼，糯米粉掺粳米粉揉匀后做饼皮，草头切切碎稍微炒一炒，平底锅油煎到两面黄，一上桌大家就抢来吃。太仓个草头饼还要讲究，草头切碎后加太仓糟油提鲜增香，作为馅头包到饼里，外头再滚上白芝麻，勒煎锅中煎到两面金黄。咬破皮子，糟香带仔草头个清香一记头冒出来，啥人也挡勿牢。郑和六下西洋是从太仓浏河港出发个，船浪个厨师曾经拿草头饼带到南洋好几只国家，搿当然也是传说。

上海郊区农民还会晒草头干，入秋后用草头干烧菜饭，叫作咸酸饭，或着搭五花肉一道烧，搭我家乡个霉干菜烧肉有得异曲同工之妙。

农家还会腌金花菜，先拿金花菜汏清爽，摊开来晾干水分后放到干净个坛子里，撒盐拌匀，腌四到五日天之后捞出来，勒太阳下头晒晒干。另外拿出一只小坛子，汏清爽揩干。勒小坛内铺一层金花菜，撒一把炒香个花椒搭茴香，再铺一层金花菜，再撒花椒、茴香，拿坛子塞得严严实实，用干净个稻草或麦秸塞牢坛口。然后拿小坛子倒立勒一口大一圈个瓦缸里向，用清水封口，二十天后开坛。用筷子夹出来个辰光要当心点，勿能让生水进到坛中，勿然金花菜就会变质。

金花菜呈金黄色，香喷喷个，咸中带眼酸甜，过老酒是一级了。

有一位开饭店个朋友一时兴起，做了一批草头馒头勒网浪向卖，我也买了几盒子。草头馒头面粉发得邪气好，雪白粉嫩，一口咬开来，清香混着酒香扑鼻而来。草头碧绿，酒香浓郁，一切刚刚好。草头馒头是春天里向个匆匆过客，碰到就勿能错过。

南宋林洪个《山家清供》里写到“苜蓿盘”，引出一只故事。唐明皇个辰光，太子身边有个参谋叫薛令之，估计是抱怨皇上提供个饭菜比较差，就随手勒墙上写了首诗：“朝日上团团，照见先生盘。盘中何所有，苜蓿长阑干。饭涩匙难绾，羹稀箸易宽。只可谋朝夕，何由保岁寒。”有日天，唐明皇来到东宫，看到搿首牢骚诗，就提笔接了两句：“若嫌松桂寒，任逐桑榆暖。”薛一看，只好卷起铺盖走人。