下载客户端

八宝饭个味道勒阿里

2021-02-22 20:56

来源：澎湃新闻·澎湃号·湃客

原创西坡海上梦叠

作者：西坡

沪语改写、朗读：顾敏

指导、推荐：丁迪蒙

编辑：王乙其

八宝饭，顾名思义，是由八样好吃个食材组成。至于是阿里八样，讲法蛮多个，比较大路个是：莲心、红枣、金橘脯、桂圆肉、蜜樱桃、蜜冬瓜、薏仁米、瓜子仁。选迭个八样食材，是有道理个：莲心象征婚姻和谐，桂圆象征团圆，金橘象征吉利，红枣象征早生贵子，蜜樱桃、蜜冬瓜象征甜蜜，薏仁米象征长寿、高雅、纯洁，瓜子仁象征平安无事。也有加红梅丝代表顺利，加绿梅丝代表长寿，后来又增添了桂花，意思是“金（金桂）玉（糯米）满堂”。但真正撑市面个食材只有两样——糯米搭仔豆沙。

豆沙邪气重要，赤豆一定要选优质个，再有足够个豆沙味道。当然还要勒加工浪相多用心思，再能有细腻、滑润个口感，恰到好处个厚度，搿些侪是基本个；对糯米个要求更加高，既要软、糯，又要有一定个咬劲，就好比走钢丝，掌握平衡邪气关键。上海老底子做点心出名个饮食店，几乎侪拿八宝饭看作是主打产品：一个是本地人欢喜吃，勿好怠慢；二是好个八宝饭，能够反映出制作者手艺个精良搭食材个品质。

印象里，勒上海以外个地区，我几乎没有吃到过八宝饭，所以一直以为八宝饭是上海特产，至少上海应该是伊个发轫之地。事实浪，迭个是个错觉。

大约摸十年前头我到郑州去，因为对当地个餐饮毫无了解，根么就学了梁山好汉个样子搭店员讲：“此地有啥个好吃、有特色个东西尽管拿来！”结果，端上来的“特色品种”里就有八宝饭。八宝饭哪能会得是郑州特产？店员搭我解释：“迭个完完全全是郑州特产，一眼也呒没骗侬！”

后来我发现，店员没瞎讲。周芬娜勒《饮馔中国》里讲得实在：“郑州虽是古都，但勒美食方面值得一提个只有米面主食八宝饭、烩面、焖饼、蒸饺等。几乎每个中国人侪吃过八宝饭，但勿大有人晓得搿道菜出自郑州。”为啥郑州人会得发明八宝饭？伊讲是因为伊面出产优质稻米。郑州郊区个凤凰台村、辉县曾经是“贡米”个产地。迭个算是有力个证据吗？

还有一种讲法：周武王率诸侯东征，打败纣于牧野，武王及定天下，建都于镐（今陕西西安西南沣水东岸）。伯达等八士因功勋杰出，深得武王搭仔人民个推崇。勒庆功宴浪，庖人做了八宝饭庆贺应景，以八宝象征有功个八士。

以出产好米而定发明权虽然牵强，但是以“八宝”影射“八士”也有眼附会。如果一定要讲陕西是八宝饭个发祥地，我推想，搿也是周武王个人马从河南带过去个。武王伐纣，是勒勒河南个地界浪，并且八宝饭勒陕西个出现，碰巧勒武王凯旋之后，道理浪向讲得通。

其实，八宝饭个“故乡”还有交关，比方讲，湖北荆州、广东徐闻，还有山东一眼地方，八宝饭侪是当地人引以为豪个特产。像徐闻八宝饭，还有一种咸个八宝来。

搭上海个八宝饭相比，郑州个八宝饭少了眼精致。但要讲古老，至少勒《清明上河图》个年代，人家个餐饮水平已经邪气像样了，而迭个辰光个“上海”或许再刚刚出现名字。“八宝饭浪加把盐——又添一位（味）”搿句歇后语，讲个大概正是上海八宝饭。

梁实秋先生讲；“从前八宝饭上桌，先端上一二小碗白开水，拨大家汏调羹，实在恶劣。（有人）用小调羹直接挖了吃，再拿小调羹直接摆勒嘴巴里舔，伊副吃相实在是让人勿敢恭维了。”梁先生讲得对，不过评论确实有眼苛刻。

宴席过半，来道甜品，搿是非常合适个。本来按规矩一人一调羹，老少无欺，一圈下来，再行旧制。但就是有一眼人，看见自家欢喜个八宝饭，就勒手里暗暗叫用劲，㑚勿是约定俗成一人一调羹嘛，好呀！伊一调羹下去，八分之一个“地盘”被划脱了，而且中心开花，拿上头个核桃、莲心、瓜子仁老啥挖脱一大半勿算，连下头个豆沙也被伊个搿把“洛阳铲”兜底挖起来，上行下效，有过之而无不及，一圈将尽，轮到最后一个人下调羹，基本浪只剩下来一团饭了。有人欢喜吃豆沙，有人欢喜吃糯米，有人欢喜一半糯米一半豆沙，眼眼叫伊只八宝饭做得勿道地，豆沙馅头勿勒贴贴当中，偏脱了，让人懊恼得来。耐么伊些小调羹像盲人个手杖，东点点，西敲敲，拿一盘好好叫个八宝饭折腾得像蜂窝煤……

上海人欢喜吃个八宝饭老底子常庄勒勒逢年过节个酒水台浪出现，现在勿大看见了，大概因为酒水台浪可以选择个点心太多了。江南一带个八宝饭侪是邪气甜，而且重油，现在有“三高”个人勿少，对甜个物什侪有眼吓丝丝个，假使搿辰光让伊来个两调羹，等于是落井下石。请客个人为在座各位个“安定团结”考虑，就拿八宝饭“和谐”脱了。像迭能样子的情况，还是蛮多个。八宝饭之所以勒酒水台上时有时无、阴晴勿定也就可以晓得原因了。

至于梁先生所讲个“劣迹”，其实大可忽略勿计。我倒觉着，拿小调羹勒清水里荡一荡，是邪气优雅个，就好比老外每吃一块牛肉，侪要用雪雪白个餐巾用力个去揩嘴巴边浪可能留有个汁渍。

假使按老外个吃法，是要拿一盘象征圆满个八宝饭按照人数平均切开分好，葛么有可能每个人吃到个只别过是一碗“豆沙拌饭”，伊种“有福同享”个快感就呒没了；伊种“一道动手，拿伊做脱”个豪迈也呒没了；伊种“哪能侬多我少”酒水台浪张张吵吵说戏话个闹猛气氛就更加呒没了，搿还勿如每人发一只豆沙粽子，中西结合，既卫生又公平。但是，八宝饭个味道勒阿里呢？

如果最终个效果差勿多，中国个问题用中国个方式去解决，蛮好！

——————————————————————————————