生活勒光明邨个风搭味之间

 原创 沈轶伦 海上梦叠

作者：沈轶伦

沪语改写：冯济民

诵读：郭莉

文字修正：丁迪蒙

编辑：王乙其

迭个光明邨勿是伊个光明邨。

大家侪晓得淮海中路５８６号光明邨大酒家，但是现在我要讲个，是作家马尚龙屋里所在个淮海中路５８４弄个光明邨，伊是现代式个多层公寓建筑，从前叫做飞霞别墅……

飞霞别墅旧址

小辰光，从屋里向四层楼晒台俯身看下去，就是光明邨大酒家个后门。假使风向变化，还会得带来光明邨个香味道，慢慢叫升到四层楼晒台。马尚龙讲：“假使我齐巧‘咸菜过过泡饭’，闻着迭股香味道实在是害人——吃了两碗泡饭，还想再吃两碗。”

……

相比石库门里个居民，彼此勒狭窄个空间里交换所有个隐私，当时光明邨弄堂里个住家，已经有了独立个煤卫设备。邻里关系，更像是今朝公寓楼里个氛围，彼此客气又矜持。小囡也并勿到弄堂里搭小朋友白相，而是各自勒勒自家房间外头个晒台浪向游戏。

姆妈家教老严个，伊勿许小囡打相打，勿许捣蛋，勿许出言不逊，勿许大欺小，当然，更勿许小囡勿争气。

“我小辰光以从来勿到弄堂里去白相而自豪。”马尚龙讲。停了一停伊又讲，“长大了想想，也是有点遗憾个”。

现在个光明邨大酒家因为卖熟食而闹猛起来之后，排队个人就一埭路里排到了光明邨弄堂里。逢年过节，买熟食个队伍有辰光要排到弄堂笃底人家个门口了。简直就像是围剿包抄。

马尚龙想：据说光明邨个鸭翅膀蛮灵个，但翅膀到了光明邨，真个是插翅难逃了。

不过，五十多年前头，光明邨大酒家还呒没以熟食取胜，主要是肉馒头、菜馒头有名。当时个店招牌还是叫“光明邨点心店”。屋里向大人拨马尚龙５角洋钿，半斤粮票，再带好钢种镬子，去买１０只馒头。为显出老吃客个气派，要对牢柜台叫一声“五菜五肉”，用迭个来显示自家老懂经个。

“师傅一听就晓得侬是一直来吃个朋友，实际浪呢，小囡面孔就勿像。有辰光排队排上去，一笼馒头齐巧卖光了，只好等勒海。外头是西北风吹进去，里向是菜馒头麻油味道飘出来，人就立勒迭个风、味当中。”

……

现在回想起来，马尚龙讲：“早饭我吃过大饼油条粢饭糕，日里夜里也勒店里向吃过面，但是从来呒没一早浪走进点心店吃过一碗面。早浪可以到点心店吃一碗面个人，勿是一般人，伊既要有铜钿，还要有辰光。一早浪向吃面，从排队买筹子，到坐勒位子浪等，再到吃好面，顶少也要一刻钟。葛末只有勿读书、勿工作个人，要么就是小开之类个角色了。”

一般人到光明邨去，只好去吃馒头。要是侬买一只肉馒头，营业员会得“勒馒头下面衬张小小个油纸头，葛末馒头拿勒手里就勿会老烫。营业员只要用铝合金夹子拿馒头夹起来，勒一叠油纸头浪一搭，油纸就搭勒馒头底下了。”

几十年里向，光明邨门口煠过油条，做过油炸个“一口鲜”点心，也开过麦当劳。最后又再次因为卖熟食而一记头爆红。店门口经历了闹猛、冷清又再次变得人头攒动起来。光明邨弄堂倒是从来呒没变化。当然。住勒弄堂里个少年长大了，阿哥阿姐也侪四散到各个地方去结婚成家养小囡了。就像从此地长出来个一棵蒲公英，风呼——一吹，侪飘脱了。

不过，蒲公英个茎杆还勒勒。迭个，就是浸润勒淮海路个风，搭仔光明邨个味之间个，弄堂晒台浪个记忆……。

——————————————————

丁迪蒙

迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。

沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。

沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。

丁迪蒙所撰写的，与沪语相关的著作主要有：

《学说上海话》上海科技文献出版社

《听听说说上海话》少年儿童出版社

《实用沪语》复旦大学出版社

《上海话绕口令》少年儿童出版社

《上海方言词语使用手册》上海教育出版社

《上海话读成语故事》少年儿童出版社

《囡囡学童谣》，少年儿童出版社

《囡囡学成语》，少年儿童出版社

原标题：《生活勒光明邨个风搭味之间》

阅读原文