下载客户端

上海闲话个闲和香

2022-02-11 15:01

来源：澎湃新闻·澎湃号·湃客

原创马尚龙海上梦叠

作者：马尚龙

沪语改写：周红缨

讲述：秦来来

审阅、推荐：丁迪蒙

编辑：王乙其

当整座城市侪勒议论电影《爱情神话》个辰光，交关人忘记了几个号头前曾经有桩小小个事体，无意当中为《爱情神话》做了铺垫。上海群艺馆推出了沪语个课程，教小囡也教大人。迭个勿是上海第一趟推出沪语教程，却是第一次报名秒杀。当时媒体是报道了好几天个。

一个大城市要开课程教迭个城市个母语，可能是上海独有了。

上海闲话又吃香了。一个“又”字，足以回到前一趟个“香”。

廿多年前头，上海人个日脚远远勿像现在介好过，上海闲话倒是“春风得意”。好几部到现在还有影响力个沪语电影电视剧，比方像电影《股疯》，电视连续剧《孽债》《何须再回首》《夺子战争》，侪是勒勒1994年到1997年4年当中集束性个飞出来个。

迭个几部剧里向个上海市井搭上海闲话，正是上海人过个日脚。我伲迭个一代上海人，小辰光大多数侪带了移民后代个家乡口音。到酱油店，我会讲买3分洋钿“迷醋”，勿是醋会迷人，而是“米醋”宁波闲话讲出来就是“迷醋”。上海闲话勒勒我伲迭个一代约定俗成，市井俗语，乃至粗话搭切口，侪“标准化”了。

同时期个情景剧《老娘舅》，以滑稽戏演员为主要班底，除了上海话，还有南腔北调，尖音团音，搭阿拉俗常个生活搭仔闲话还是有区别个，应该勿勒勒沪语个影视剧之列。

后来上海再也没拍过有影响个沪语电影电视剧。据说，因为是沪语，迭个几部剧是受到了诟病个。《孽债》拍了普通话搭沪语两个版，沪语版播了呒没几集，改播普通话版了，上海味道也就淡了眼了。

90年代中后期，上海迎来了新一波个移民潮，普通话慢慢叫变成了上海第一公用语。有一趟我去政府机关，会议桌浪向一块小铜牌明确个提示：请讲普通话。上海人巧舌如簧，语言能力真强，普通话讲法讲法，就普通了。不过，作为母语个上海闲话，闲了。

闲了上海话，急了讲上海闲话个人。母语就是母乳。只有有了母语，再会有自家个市井，自家个人文。如果讲，一方水土养一方人，那么，搭一方水土日月同辉个，是一方母语。也完全可以讲，一方母语养一方人。

应该是勒勒本世纪之初，有文化名家提议勒勒电视台开设沪语个新闻栏目，还拿上海闲话搭海派文化联系起来。媒体侪报道过，一片共鸣之声，不过沪语新闻还是没开出来。因为2500万人的移民城市，讲上海闲话个人不及一半。

让上海闲话不闲个，有2010年世博会个暗香浮动。迭个是一个美丽个意外。

为了世博会，上海地铁搭公交双语报站名了。也恰恰勒勒迭个辰光，勿少老年乘客提出了意见，听勿清爽外国闲话普通闲话报站名，到听清爽了已经过站了。伊拉讲，阿可以用上海话来报站名呢？

还有，上海人居然也陌生上海闲话了。“世博会”讲出来变成了“自博会”。勿得勿讲，极其个洋泾浜。

如果迎接世博会个上海，连自家个母语侪遇到了生存个危机，葛末世界眼中个上海，大概要去申请上海闲话个联合国非遗了。

2010年3月7日，新民晚报开辟了“上海闲话”个专版，每个礼拜一趟，刊登上海个市井故事搭上海闲话写个文章。迭个是个信号：上海闲话是应该推广个。我去参加过“上海闲话”专版个座谈会，亲眼见证为了某一个字个写法某一句闲话个用法，像吵相骂一样热闹。我勿大懂，但是我晓得，吵，意味着上海闲话一眼也勿闲。“上海闲话”专版一直到今朝还勒勒海。