下载客户端

上海女人个“嗲”

2022-04-26 15:23

来源：澎湃新闻·澎湃号·湃客

原创沈嘉禄海上梦叠

作者：沈嘉禄

沪语改写：边秦翌

讲述：牛美华

推荐：丁迪蒙

编辑：王乙其

“嗲”，是上海女人个专利。别个城市里肯定也有“嗲”劲十足个女性，但是迭个字个方言特征忒强，只好归上海独享。上海女人个“嗲”，有点妖，但勿是邪气多；有点媚，也勿是邪气多；上海家主婆擅长做色拉，一盆道地个色拉必须要加几滴白醋，勿好呒没，也勿好忒多。

实际浪，“嗲”个内涵相当复杂，难以用风情、风采、风骚咾啥个词语来注释，勒日常生活场景当中，伊还可以是一种声音、一种气息、一只背影、一只眼神、一只手势、一种戏剧效果……上海人勒形容具体事物个辰光也会用到迭个字，譬如，一只创意、一种设计、一幅画、一道菜、一道甜点、一只场景……“瞎嗲”、“老嗲个”，直白个置顶评价，脱口而出就可以产生惊天动地个效果，但是还是比勿过勒形容女人个辰光所具有个伊种丰富性搭仔饱和度。

易中天勒《中国个男人搭女人》一书里向讲：“‘嗲’迭个词，完全是属于南方个。……伊就是某些女小囡身浪特有个，能够让男人心痛怜爱个‘味道’。一个女小囡之所以能够有得搿种味道，大多数是因为身材娇小、体态妩媚、性格温柔、谈吐文雅、举止得体、穿着时髦，静则亭亭玉立，动则娉婷袅袅，言则柔声轻诉，食则细嚼慢咽，从而让男士们柔肠寸断，疼爱异常，大起呵护之心”。

易中天讲得呒没错，不过伊是从外形浪向来评判个，伊关注到个“谈吐文雅”里向还没涉及到地方语言。离开方言讨论“嗲”字，难免有点隔靴挠痒。

因为，上海个地方语言让上海女人个“嗲”别具一种都市风韵。

老底子，上海女人勒街坊里弄搭人打交道个辰光，欢喜讲自家个家乡闲话。伊作兴是要确认自家个文化背景，建立一只有归属感个朋友圈，同时也勒寻找搭仔模仿当中，拨一个相宜个小社会所接纳。苏州闲话、嘉兴闲话、无锡闲话、杭州闲话、甚至震感强烈个绍兴闲话搭宁波闲话，勒社区里有得宽敞个通行范围，原籍非江浙两省个居民也愿意接受，甚至欢喜模仿。做家务、吃夜饭、乘风凉个辰光听听评弹、沪剧、越剧、独脚戏、宁波滩簧，也是寓教于乐个风化。

我觉着地方语言其实可以用“嗲”字来评级个。经过岁月个淘洗，上海人已经达成共识：苏州闲话是最嗲个，挨下来大概是无锡闲话、常熟闲话、杭州闲话、嘉兴闲话。“情愿搭苏州人吵相骂，也勿要搭宁波人讲闲话，”搿是上海人对两种方言所代表个两个族群个精准分类。虽然上海语言里向个“阿拉”来自于宁波闲话，但是总体来看，上海闲话从本地闲话脱胎出来、能够自成体系，主要得益于苏州闲话。

苏北闲话也邪气有特色，但是伊只好勒特定个范围之内通行。也只有勒特定个范围内，再好获得戏剧性个效果，铿锵有力，抑扬顿挫，别有一番烟花三月、乌衣巷口个韵味。

熊月之勒《上海人解析》一书当中也提到迭个现象：“讲乡土闲话，交乡土朋友，吃乡土饭，供乡土神，做家乡生意，上海来去自由，搿些侪强化了各地勒上海个居民对移出地个情感。于是，寓居上海个各地移民，大多数保持勒对上海搭家乡个双重认同”。

对伊个时代个上海女人来讲，伊拉作兴还呒没“双重认同”个意识，伊拉只是嫁鸡随鸡，嫁狗随狗，扎根上海就要尽快个融入搿座光怪陆离个都会。但是搿种温情脉脉个感情倾向，加上江浙方言个通行搭仔上海方言个形成，勒上海弄堂里侬一句我一句个交流，就可以让大家觉得一种“嗲悠悠”个氛围。前一抢《爱情神话》个热播，成为现象级电影，片子里个三个女人嗲伐？忒嗲了，嗲就嗲勒伊拉个坦荡做派搭现代性人格，嗲勒伊拉是用上海方言思考搭仔表达个。

易中天还讲：“上海女人是搿能介个一种人，要是有一点点漂亮一点点娇嗲个闲话，也可以做出邪气漂亮个样子来，伊拉天生就懂得，自家老有女人味道个”。

上海女人之所以特别有女人味道，除脱南方女性原本就比较娇美，城市生活远远叫比农村优越之外，更家重要个一点，是伊拉特别看重自家个性别特征，有一种可以称之为“女性养成教育”个传统。伊拉从小就从姆妈搿搭、老师搿搭、街坊邻居搿搭晓得女人应该有哪能介个姿态、语调搭仔吃相，应该做哪能介个女人。

其实上海女人也勿是最嗲个，最嗲个勒苏州，“苏州嗲妹妹”嘛。有些上海女人勿算漂亮，伊也呒没办法怪爷娘，只好认命，但是伊可以搭人家拼气质，拼修养，拼阅历，修为起到了形象再塑个作用。搿种聪明女人善于拿自家最好个一面呈现勒公众面前，明亮、通透、善良、坚定、自信，伊个眼睛勒搭侬讲闲话。

今朝，上海女人总体浪可以称为风情万种，但是骨子里照样有一股硬劲，就像王安忆勒《寻找上海》一书里向讲个：“上海个女性心里侪有股硬劲个，否则侬就对付勿了迭个城市个人搭事”。勒单位里特别能干，勒社交场合也落落大方，举止得体，下班之后马上往屋里跑，小囡是伊永远个牵挂。侬请上海女人吃饭，要提前三四天预约，最好提前一个礼拜，让伊拿屋里个一大一小摆平，再会打扮得三青四绿赴一场“有价值”个饭局。

奋斗勒职场个上海女人搭北京女人勿一样，伊呒没背景，呒没靠山，呒没四通八达个关系网，一切要靠自家开天辟地。所以伊晓得一切来之勿易，要珍惜当下，享受生活，上海女人作兴是全国最敬业个。

所以，上海女人勿是“白、富、美、傻”个“嗲”，勿是“樊素樱桃口、杨柳小蛮腰”个古典美女，勿是“侍儿扶起娇无力”个杨贵妃，更加勿是“回眸一笑百媚生，六宫粉黛无颜色”搿能介撩人个红颜，而是成熟、知性、善解人意、有仔一定阅历个社会性美女，有蛮高个理解力、执行力搭创造力个职场美女。就像王安忆所讲个：“伊拉个经验搭感情个能量邪气大唻，难免会有点杂芜，蛋是勿怕，伊拉兜得牢，经得起，抗得动，岁月淘洗，自然会得淘出真金。”

外省人常庄拿上海男人当作嘲笑对象，但是对上海女人却勿得勿刮目相看，肃然起敬。特别是半个多世纪来个风云变幻，上海女人处乱勿惊个从容，如沐春风个优雅，尤其是作为社会名流、文化巨匠背后个贤内助，集睿智胆识搭柔情风韵于一身，差勿多就成为了东方女神个完美诠释。

《花样年华》里个张曼玉、《色戒》里个汤唯、《爱情神话》里个马伊琍、《前妻》里个吴越，也是伊拉个偶像。

上海女人聪明、能干、勤奋、美丽、精致、优雅、时尚。上海有宋庆龄，也有谢希德；有茅丽瑛，也有郑苹如；有周錬霞，也有关紫兰；有董竹君，也有张爱玲；有秦怡，也有陈冲；有孟小冬，也有史依弘；有顾圣婴，也有朱洁静；有周小燕，也有李宇春；有印海蓉，也有吴尔愉……假使要讲颜值，伊拉自有一低头个温柔，也勿缺沉鱼落雁、闭花羞月个娇美；假使侬讲主要靠气质，可以啊，伊拉绝对勿输拨任何城市个女人！

上海迭座城市，因为有了上海女人，再有了别样个风采搭魔力。