下载客户端

兜兜荡荡淮海路

2022-05-05 20:03

来源：澎湃新闻·澎湃号·湃客

听全文

原创马尚龙海上梦叠

作者：马尚龙

沪语改写：丁曙立

讲述：王邦基

审阅、推荐：丁迪蒙

编辑：王乙其

交关年数前头，相声大师侯宝林有段相声，学两个上海小姑娘荡马路辰光个对话：阿拉再到啥个商店去兜兜啦？人家讲服装店有今年个裙子唻……

侯宝林有眼生硬个上海闲话，当年勿晓得有多少人笑痛了肚皮，但是伊拉侪呒没意识到，侯宝林点出了上海人个情调，搿就是：马路荡荡，店家兜兜。现在想想，搿勿是大师个创作，是伊对一种生活个提炼。

荡马路，兜商店，刚好是上海人生活个细碎。

荡马路、兜商店，说明了闲情逸致个状态，绝对勿是行色匆匆个；荡马路、兜商店，也说明了漫无目的个状态，绝对勿是直奔主题个；荡马路、兜商店，还说明了马路搭仔商店个亲和值得荡、值得兜。常庄是勒勒漫无目的个荡荡兜兜；里向，有得意外个心动，一趟又一趟个意外个心动。

一个人，尤其是女个，熟悉个马路、熟悉个店家，就像是姊妹淘一样，大方布店过去是高桥食品店，再过去是电影局、床上用品商店……几十年之后仍旧背得出伊拉个顺序，外加搭常庄去个几家店个营业员像煞还有约会个意思。侬来啦；侬好呀，彼此面熟陌生。

勒交关年数里向，淮海路值得荡个，淮海路浪个店家值得兜个。淮海路路两边个两排梧桐树，一幢幢老公寓，还有店家个橱窗侪是好看个，甚至过年过节到淮海路去看看橱窗也是开心个事体。搿就需要荡了。至于一家家个店呢，则是兜来兜去。兜，也是只特别形象个动词，店家个门面最多两三开间，从搿家出来，又踏进旁边一家，像兜圈子一样。淮海路最黄金个一段三百多米，荡荡兜兜就是半日天。

套用《爱情神话》里个一句神话：一个呒没勒上海荡过马路、兜过商店个女人，一生是勿完整个。

不过，慢慢叫个，荡马路、兜商店勿时尚了。大型个销品茂邪气快个造起来了，有停车场，有商店群、美食、娱乐……勿管刮风落雨寒冷酷热，从B3进去，就是四季如春，避风挡雨，吃啊撒啊白相啊侪勒同一只销品茂里向。荡马路、兜商店，相形见绌啊，忒古老也忒勿便当了：一顶洋伞撑撑收收，店里店外温差十度，停车场更加是老老远个……

销品茂是勿是真个就会得拿侯宝林相声当中个荡马路兜商店个桥段，摆到古年八百代去了呢？

所谓天无绝人之路，更加勿会绝了荡马路。销品茂个优势仍旧是优势，不过，销品茂“英雄所见略同”个同质化，也是与生俱来个胎记，少了荡马路搭兜商店，自然少了麻烦，但是也少了乐趣。