下载客户端

沪语悦读：糖藕（上）

2022-07-28 06:56

来源：澎湃新闻·澎湃号·湃客

听全文

原创西坡海上梦叠

来源：夜光杯

原创：西坡

改写：郭莉

讲述：赵群社

审阅、推荐：丁迪蒙

编辑：王乙其

“四处野鸭和菱藕，秋收满畈稻谷香，人人都说天堂美，怎比我洪湖鱼米乡……”歌剧《洪湖赤卫队》里向搿段歌词，让大家充分展开想象个翅膀：洪湖地区莲藕产量，一定是全国数一数二个。

《湖北日报》2021年12月17号报道讲：“目前，洪湖市野生莲藕面积10万亩，人工种植莲藕21万亩，莲藕面积跃居全国县市第一。”咦，为啥是“跃居”而勿是“稳居”呢？看来，洪湖地区曾经勿是“第一”。不过，要讲洪湖莲藕是全国“三甲”里个“一甲”序列，总也勿会地错个。再讲嘛，洪湖属于湖北，葛末，湖北省用莲藕做个小菜搭仔点心，自然也是高举高打个了。

实际浪偏生勿是个。

我几趟踏上湖北大地，居然难见莲藕肴点个踪影。唐鲁孙《武汉三镇的吃食》里向寻勿到莲藕；湖北籍作家陈荒煤个《家乡情与家乡味》里向呒没莲藕；周芬娜《饮馔中国》个“湖北菜”里向，谈也勿谈莲藕，最匪夷所思个是：湖北“美食前十名排行榜”上头，莲藕肴点根本排勿上去。哪怕是外地人看来可以跟热干面齐名个莲藕排骨汤，也冷落勒边头，实在叫人意外。勒莲藕产量少得可以忽略勿计个上海，糖藕也随处看见。相比之下，介大个湖北，为啥糖藕也看勿见？将近6000万人口里向，居然呒没人立出来挺一挺糖藕？倒是蛮滑稽个！

元代大画家倪瓒个《云林堂饮食制度集•熟灌藕》里向搿能描述：“用最好个粉藕，加上蜜糖搭仔一点麝香，从大个一头灌到藕洞里向。再用油纸包扎好，慢慢叫煠。藕熟了切片，趁热吃。”迭个大概是最早写到糖藕个；清代大诗人袁枚《随园食单•熟藕》也写伊自家欢喜个：“藕要灌米再加糖去煠，汤水也要掌握好，味道就好了。店家卖个侪用碱水，味道变脱，勿好吃。我欢喜吃嫩藕，软熟但还是要牙齿咬断，所以莲藕里向味道还勒嗨。要是老藕煠成酥泥，就呒没味道了呀。”

古代文化精英个推崇之物，湖北人为啥无动于衷？上海人表示严重勿理解。梁实秋讲过伊小辰光住勒北京：一早跟阿哥步行到学堂，校门口有只小吃摊，切下来一片片物事摆勒碟子浪，洒红糖汁、玫瑰木樨，淡淡个紫颜色，样子实在叫人馋唾水溚溚渧。搿就是糯米藕，一份四只铜板，但是阿拉个早点费每日天只有两只铜板，兄弟两家头马上决定，今朝饿一日，葛末明朝就好尝美味了。不过迭个代价忒大，所以也勿可能经常去吃。请大家注意迭段描写：一个北京小学生可以轻松“搞定”个糖藕，号称“莲藕之乡”个人，情何以堪？