啊，酸梅汤

原创 孙宏彝 海上梦叠

作者：孙宏彝

沪语改写、推荐：丁迪蒙

诵读：王浩峰

编辑：王乙其

也是勒勒大伏天，烈日当空，辣霍霍个太阳晒勒海。立勒浑浊、发烫个水稻田里邪气吃力个拔水草个农场知青当中，有个让人振奋个消息勒勒传：今年有得防暑降温用个冷饮费了。搿是从来也呒没有过个。

几天之后，我到会计伊面搭拿晒粮班个冷饮费侪领得来了，每个人有两只角子，共总有得两块多洋钿。搿点钞票要用一个热天，哪能办呢？讨论了半半六十日，最后大家一半是好奇、一半是怀疑个同意了一个老职工个建议：自制酸梅汤。

第二日天过脱中浪，出工个辰光，我拿伊个老职工留下来做酸梅汤，其他人侪去翻晒稻谷。太阳邪气毒，热气逼人，田里向农作物个叶子侪耷拉下来了，泡勒河浜里个老牛也热得来拿舌头吐出来喘气。晒粮班个“光榔头”清一色赤膊短裤，所有个人汗是流得嗒嗒渧。大家一面勿停个做生活，一面勒勒嘴巴里时勿时个骂两句搿爿天。

突然之间，老老远个地方出现一个挑水桶个人影子。啊，大家侪勒勒盼望个酸梅汤来了呀。

水桶一摆到场地浪，大家就争勒围上去了，急勿可耐个用碗去舀酸梅汤吃。看牢仔伊拉咕嘟咕嘟、一大口、一大口吃个神情，听伊拉勿断发出来个称赞声，我个喉咙口也好像觉着痒兮兮个了。

轮到我个辰光，桶里向个酸梅汤已经剩下来勿多了。我拿桶側过来，舀了大半碗，伊种颜色搭店里向个酸梅汤差勿多，吃了一口，口感还是可以个，只不过稍微酸了眼。我贪心个吃，立时三刻觉着一阵个凉快。

休息辰光，我带勒几分好奇讨教伊位老职工：“搿酸梅汤是哪能介做个啊？”伊吐口烟，哈哈笑：“邪气简单，只需要吊桶井水，倒眼醋进去，再摆眼糖精片，搅拌均匀之后好了。”

搿年夏天，阿拉常庄吃个冷饮就是搿种土制个酸梅汤。伊个年月，搿土制个酸梅汤对阿拉搿些每个号头只有廿几块工资个知青来讲，可以讲是像琼浆玉液一样，勒脑海里留下来了非邪气甜美个记忆。

多少年数过去了，自从离开农场之后，我再也呒没吃过搿种土制个酸梅汤。但是，每趟到了大热天，当大家邪气畅快个吃雪碧、可乐个辰光，我总归会得带勒几分眷恋个想起勒勒农场辰光吃过个伊种独特个饮料。

出于怀旧个情怀，前两天，我按照伊个老职工讲个方法，蛮有兴趣个试勒海自家去做酸梅汤。呒没井水就用冰水，里向还特意摆了勿少砂糖。做好之后，我蛮得意个去品尝了。但是，勿晓得哪能搞个，制作个原料要比农场辰光个好，味道却是呒没当年能个美了。小囡吃了几口，也一直讲勿好吃。

搿些年，随牢仔生活水平个提高，消费习惯也逐渐发生了变化。但是，吃伊种“酸”而呒没“梅”味道个饮料，又一趟让我回忆起农场生活。想到当年吃搿种饮料辰光个喜悦搭仔欢乐，我个情绪勿禁又一趟拨深深个激动起来了。

抚今忆昔，哪能勿让令人思绪起伏、感慨万千呢！

作者：孙宏彝

诵读：王浩峰

——————————————————

丁迪蒙

迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。

沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。

沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。

丁迪蒙所撰写的，与沪语相关的著作主要有：

《学说上海话》上海科技文献出版社

《听听说说上海话》少年儿童出版社

《实用沪语》复旦大学出版社

《上海话绕口令》少年儿童出版社

《上海方言词语使用手册》上海教育出版社

《上海话读成语故事》少年儿童出版社

《囡囡学童谣》，少年儿童出版社

《囡囡学成语》，少年儿童出版社

原标题：《啊，酸梅汤》

阅读原文