下载客户端

梅林午餐肉，上海老味道

2023-04-19 14:05

来源：澎湃新闻·澎湃号·湃客

原创杨忠明海上梦叠

作者：杨忠明

改写、讲述：朱友好

审核、推荐：丁迪蒙

编辑：王乙其

2022年个年底，黄桃罐头冷陌生头变成了大家欢喜个物事，线上线下侪成为了抢手货。有人问我：“㑚小辰光吃黄桃罐头伐？”我开始回忆，记忆当中像煞呒没看到过用黄桃做成罐头个，只有橘子、番茄酱、西瓜皮罐头。

黄桃含有维生素C，伊个肉还带颜酸味道，呒没汁多、甜软个水蜜桃受欢迎，乃末拿伊拉用糖水烧了以后再浸泡，装勒罐头里，颜色也讨人欢喜，近几年邪气受欢迎。

记得小辰光罐头食品邪气吃香，逢年过节走亲眷辰光，除脱水果、糖果、饼干，还要买一眼“梅林”牌罐头食品，邪气上档次，譬如糖水橘子、麦乳精、午餐肉咾啥。

屋里呒没冰箱个年代，吃个物事辰光侪摆勿长个，上海人欢喜去“食品一店”买眼罐头备勒海，有常时屋里来勿及烧菜，开听罐头就可以应付应付。埃歇横里阿拉屋里常庄吃“梅林”牌个清蒸猪肉、沙丁鱼、茄汁黄豆猪肉罐头。

上海人叫罐头为“听头”（英文Tin的音译），屋里向冷陌生头来人客了，立时三刻开两听是邪气有面子个事体。老底仔个听头大多数用马口铁做个，形状有圆扁、长腰扁、长圆形、扁方、火腿形、中圆形，后首来有了玻璃瓶装罐头，还有种小玻璃瓶个兰州牛肉汁、“白兰氏”鸡精，一趟吃一小瓶。

20世纪60年代，听头麦乳精属于高档补品，听头咖啡也邪气奢侈。我个老师陆康屋里常庄备红颜色听头个上海咖啡，每日天个爱好就是吃杯咖啡，我也常庄去伊屋里蹭杯现烧个咖啡吃吃。上海名画家谢之光先生欢喜吃咖啡，伊常庄到一位医生朋友屋里吃迭种听装咖啡烧个咖啡，吃好还带两罐回去。当然咾，谢老一个下半日勒医生屋里又吃咖啡又画图，留下来一大批作品走了，我想，现在迭些画可以买几卡车咖啡。

梅林罐头食品厂勒上海邪气有名， 1930年7月成立，由几个厨师各自拿出积蓄，又向银行贷款以后合伙开个，名字有“梅花香自苦寒来”个意思。勒成立食品厂之前个1929年，伊拉研制出了“梅林”迭个创业产品——第一瓶国产番茄沙司。1933年上海梅林罐头食品厂向当时个国民政府注册，并且正式对外使用由盾牌图案、中文“梅林”字样以及罗马文“MALING”组成个商标。后首来研制出红烧扣肉、红焖牛肉、红烧鸡、油焖笋尖、四鲜烤麸、五香禾花雀、凤尾鱼咾啥罐头食品，到1938年，“梅林”外销个罐头达到126种；1958年搭捷克合作，勒中国第一趟做个西式午餐肉罐头，并且向欧洲出口；1959年研制出西式高温火腿罐头，同年研制出中式八宝饭罐头。

近几年，有常时出去买菜勿方便，我就勒网浪买“梅林”个午餐肉、红烧牛肉、清蒸牛肉、红烧肉罐头，还是老味道，方便实惠。我还买了沙丁鱼、油浸金枪鱼、红烧带鱼、梅菜扣肉、红烧小黄鱼、云腿午餐肉咾啥，据讲现在罐头食品勒网浪卖得邪气好。

朋友施敏杰讲：“老底仔呒没钞票，想吃咖啡只好到咖啡店里买烧过个咖啡渣渣头，转去加眼水再烧烧。阿拉屋里甚至拿蚕豆衣炒焦以后加水烧冒充咖啡吃，伊股苦味道确实有眼像咖啡。有种英国进口个小瓶装‘鲍威尔牛肉汁’是滋补身体个营养品，我小辰光拿迭能个小瓶子，到外婆屋里偷装麻油，拿转去拨姆妈拌面。广东人欢喜用罐装豆豉鲮鱼加鸭屁股蒸来吃，味道又香又肥，忒赞唻！大个马口铁罐头还好改成功煤油炉。”

网浪寻到几张旧照片，其中有张是老上海乍浦路348号“达影罐头食品商店”，专门买中外罐头食品、名厂糖果饼干面包、广东腊味道送礼个佳品，由李达川、梁影夫妻二家头开个，店名从两个人个姓名当中各取一个字。商店亨八冷打有三层，底层铺面开店，二层是会客室搭俱乐部，三层是卧室。还有张照片是南京东路浪个“先施百货公司”，老照片里可以看到百货公司罐头部里进口罐头摆得邪气整齐，还可以看出有奶粉、巧克力、咖啡、鱼、肉、香烟、水果罐头。另外一张老照片拍个是上海街头一家“祥泰合茶食店”，巨幅个广告上头，“中外罐头”四个字邪气显眼。

毛一百年过去了，罐头食品又回来了，“梅林”罐头个老味道，从来也呒没改变过。