《繁花》里个黄河路，曾经是模子菜个江湖（下）

原创 沈嘉禄 海上梦叠

作者：沈嘉禄

诵读改写、诵读：周红缨

文字、语音审核：丁迪蒙

编辑：王乙其

有人要问搿是啥个帮派？无帮无派，大家叫伊“，模子菜”。模子两个字，江湖气邪气浓个，以前，上海人约打相打，就叫“配模子”。擎天柱拿小三毛打得趴下来，模子勿配，恃强凌弱，让人家看勿起。所以我认为，剑走偏锋个模子菜是非主流文化个骄傲呈现，背后是异域文化搭仔海派文化杂糅风采个闪烁。

刀鱼狮子头夜来香梅童鱼石锅雪花牛肉波龙麻婆豆腐

食无定法，适口者珍，搿是古人传下来个道理。我勒黄河路浪还吃到过XO酱炒黄螺片、天华秘制温蟹、糯米蒸甲鱼、荷叶粉蒸河鳗、香炸鸡软骨、臭豆腐蒸咸蛋皮蛋、沙嗲蒜香骨、小龙虾粉丝煲、洋葱大肠煲、蟹粉黄鱼狮子头、韩国牛柳粉丝煲——其实韩国是呒没搿道菜个，芝士黄油煎银鳕鱼、啤酒鱼排、牛油果奶汤鱼腩、白蟹粉皮煲、香煎鹅肝配藕夹、鲍汁扣鹅掌配黑松露炒饭、浓汤东星斑配桃胶、鲍汁鹅掌配老油条、肥牛肉金菇卷、黑椒濑尿虾配萝卜丝酥饼等等、等等。老油条塞肉炒荷兰豆或者烧丝瓜，我也欢喜个。汪曾祺讲“嚼之声动十里”个油条塞肉是伊个首创，黄河路浪则有升级版，油条塞虾茸，味道更加好。

豉香脆炸笋壳鱼咸蛋黄豆板酥干蒸甲鱼裙边

年糕本来是家常主食，勒黄河路浪也好让伊入菜，经典款式就是毛蟹炒年糕。毛蟹也叫六月黄，天热辰光，弄堂人家用来炒毛豆子，实在是过老酒个一道好小菜。年糕搭毛蟹结盟之后，吮吸了毛蟹个酱汁，味道一流，就可以上台面了。后来，又整出了八宝辣酱炒年糕、膏蟹炒年糕、甲鱼炒年糕、酸辣牛蛙炒年糕、童子鸡炒年糕、黑椒牛仔骨炒年糕、苔条炸手指年糕等等，任劳任怨个年糕，终于收获了奥斯卡最佳男配角奖！

海纳百川，不拘一格，与时俱进，新意迭出，让“模子菜”拥有了众个多粉丝。有辰光，酒足饭饱个老吃客突发奇想，拿厨师叫出来商量，迭能一来，师傅索介再炒一盆，味道对路，一道创新菜就有唻。

红烧鸭肠鸭肝配油豆腐红烧蹄髈配鲜鲍牛油果塔塔

现在，黄河路美食街进入了冰河期，只有苔圣园搭仔乾隆美食还“誓与阵地共存亡”，酒糟蒸鲥鱼、烧汁牛肋骨、红葱头排条、乾隆花雕鸡、红烧龙头烤、海皇豆腐、海鲜捞粉丝、伤心凉粉等等，一个勿当心拨正规军抄了作业，老板呢，只好勿响了。

“侬是一只模子”！搿句闲话现在还是对一个上海男人个最高评价。而模子菜呢，还有点名不正、言不顺个尴尬。不过要是厨师搭仔食客侪勿在乎个闲话，搿就坦荡了。好吃是王道。

作者：沈嘉禄诵读：周红缨

丁迪蒙

迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。

丁迪蒙所撰写的，与沪语相关的著作主要有：

《学说上海话》上海科技文献出版社

《听听说说上海话》少年儿童出版社

《实用沪语》复旦大学出版社

《上海话绕口令》少年儿童出版社

《上海方言词语使用手册》上海教育出版社

《上海话读成语故事》少年儿童出版社

《囡囡学童谣》，少年儿童出版社

《囡囡学成语》，少年儿童出版社

原标题：《《繁花》里个黄河路，曾经是模子菜个江湖（下）》

阅读原文