下载客户端

金铃塔与上海说唱

2024-03-11 15:28

来源：澎湃新闻·澎湃号·湃客

听全文

作者：曹振华

刊登：新民晚报

讲述：钱程

文字、语音审核：丁迪蒙

后期制作：高仁

编辑：王乙其

说唱是早年流行于上海搭仔苏浙部分地区个一种曲艺形式，脱胎于唱派独脚戏。到了20世纪50年代，说唱演员黄永生到北京参加全国文艺汇演。相声泰斗侯宝林对黄永生讲，全国叫说唱个曲艺形式有交关，侬用上海闲话来说唱，就应该叫“上海说唱”。

我第一趟听上海说唱，是20世纪60年代从收音机里听到袁一灵演唱个《金铃塔》：“桃花纽头红，杨柳条儿青……”接下来么就是“苏州城里四秀才郭陆卜束……”“冰灯钉鹰星……”等等，吐字清爽，一气呵成。我当场就听得入迷了。从此以后，只要听到收音机里唱起《金铃塔》，我就会坐下来听一歇。《金铃塔》也老快个风靡上海滩。

袁一灵个弟子，说唱表演艺术家黄永生进一步推动上海说唱发展。还有同为袁一灵先生个弟子龚伯康搭仔蔡惠中、林锡彪、方艳华、顾竹君等也勒了舞台浪表现了上海说唱个海派风采，勒了说唱表演里增加了南腔北调、地方戏曲，传承了“什锦说唱”个唱派风格。伊拉唱个《热心人》《吃老酒》《上海游》《石油塔》《人财两空》《高价姑娘》等等，侪斜气受欢迎。说唱表演里个人物角色讲起各地方言，喜剧色彩斜气浓。黄永生又别出心裁，创作了《山》《人》《灯》《门》等作品。

有一次，我看黄永生演唱《山》，伊一口气唱了九十九座山。既让听众感叹阿拉国家个美好风光，唱词曲调又让人听了哈哈大笑。曲调丰富多彩，运用了越剧、锡剧、淮剧、甬剧、黄梅戏等地方戏曲，一曲唱好，另一曲又接上来，行云流水，天衣无缝。最后，勒了观众个掌声里，伊又拿出伊个绝活，从《山》个最后一句开始倒唱，唱起来快而勿乱，一句勿错，一字勿漏。观众惊叹，掌声喝彩声再起高潮。我忽然想到滑稽泰斗周柏春勒独脚戏《学英语》里向倒背英文字母，最后一句“DCBA”让人拍案叫绝！黄永生倒唱《山》同样让人叹为观止。

周柏春勒了上海说唱浪也有名作，比如《龙华塔》，用《金铃塔》个曲调唱颂龙华塔个风光，同时批评个别游客采摘桃花个勿文明行为。电影《三笑》里有一个老船工划船送唐伯虎追秋香，里向有几段江南山歌唱得蛮有趣，“早穿棉袄午穿纱，腊月里抱了火炉吃西瓜”“一年四季百花香，秋香桂子独称王”。虽然迭个船工是用普通闲话唱嗰，但是伊个音调唱腔、让我觉得斜气熟悉。后来电视台一档戏剧节目里提到，为老船工配唱嗰正是周柏春。