下载客户端

沪语悦读：青青梅子及时摘，黄熟梅子无人要（上）

2024-05-07 15:54

来源：澎湃新闻·澎湃号·湃客

作者：薛理勇

沪语改写：丁曙立

讲述：李国琪

文字、语音审核：丁迪蒙

编辑：王乙其

《诗经》是我国第一部诗歌总集，也是研究中国古代文化个重要著作。《诗经》当中个“风”，主要收录当时各个地方个民歌、民谣，而民歌个歌词，大多数又是取自于百姓身边熟悉个事物来作比喻个，其中就提到了勿少植物搭仔动物。于是，《诗经》当中涉及到个“草木鱼虫”，就成为了研究中国古代生物个珍贵史料。

梅，是中国个特产，也是古代最早拨认识搭仔培植个花、果兼用个树种之一，《诗经》有好几篇诗提到梅，其中最直接个就是《召南・摽有梅》：

摽有梅，其实七兮。求我庶士，迨其吉兮。

摽有梅，其实三兮。求我庶士，迨其今兮。

摽有梅，顷筐塈之。求我庶士，迨其谓之。

“召南”是西周时期一个南方个地名，迭个地方也受到周文王个教化，女子侪晓得应该及时出嫁，即以梅子代表“妹子”，向男个发出示爱个信号。“摽”即落下、打落个意思，我拿伊翻译成白话诗：

梅子熟了会自然落下，树上只剩七成梅子。亲爱个阿哥加把劲，趁吉日搭阿妹相会。

梅子熟了会自然落下，树上只剩三成梅子。亲爱个阿哥加把劲，趁吉日与阿妹相亲。

梅子熟了会自然落下，采摘个梅子装满筐了。亲爱个阿哥加把劲，选个吉日来定亲。

“梅”搭“妹”谐音，“梅子”常庄拨当作“妹子”用，现代民谣里向，也有“青青梅子及时摘，黄熟梅子无人要”个讲法，就是劝已到了婚嫁年龄个姑娘要及时出嫁，一旦人老珠黄，成了“圣女”，想嫁也呒没人要了。

……

梅、杏、李侪是属蔷薇科落叶乔木，是近缘个植物，梅原产地中国，也以中国个种植量最大，所以英文当中呒没搭梅树相对应个词，英文plum既指李，也指梅，为了表示区分，拿梅花写作plum blossom，而梅子则是sour plum，就是“老酸个李子”。

梅虽然是花、果兼用个植物，但是梅子忒酸，果实又小，而伊勒早春还呒没长叶子个辰光就来煞勿及开花，搿个辰光大多数个植物还处于冬眠期。“一枝独芳”个梅花拨古代个文人骚客赋以更加多个文人情怀，使伊具备了相应个人格化个成分，伊个观赏价值就远远叫高于果用价值了，赏梅，也就成为了中国文人邪气独特个情怀。

梅树开花以后开始结果，初夏就进入了采摘期，没熟个梅子颜色是青个，称之青梅，成熟以后变黄，称作黄梅。勒江南，青梅变成功黄梅个季节，就是多雨个季节，搿个辰光就拨叫作“黄梅天”，落雨拨叫作“黄梅雨”或者“梅雨”，而英文又称之为plum rains。看来，“梅雨”“黄梅天”个名称由来，确实是来自于梅子泛黄个季节。

勿论是青梅或者黄梅，侪是邪气酸个，所以，梅子老少生吃，大多数用来加工成为蜜饯。成语有“望梅止渴”，出典《世说新语》：当年曹操带领军队远征，太阳高照，士兵饥渴难熬，曹操搭士兵讲，前头有片梅林，赶到伊面去扎营。士兵听到“梅林”以后侪“口皆出水”，梅子之酸可想而知。于是，梅子就多了几只雅号，“止渴将军”搭仔“曹公”。