下载客户端

沪语：梅花，中国文人个精神伴侣（一）

2025-02-20 15:51

来源：澎湃新闻·澎湃号·湃客

听全文

作者：沈嘉禄

沪语改写、讲述：朱枫

审核、推荐：丁迪蒙

编辑：王乙其

一，江南无所有，聊赠一枝春

梅花搭兰花、竹头、菊花并称为“四君子”，伊是当仁勿让个“带头大阿哥”；勒传统绘画题材“岁寒三友”当中，梅花又是搿能个弹眼落睛。梅花迎风傲霜，灼灼其华，素有“雪中高士”个美誉。古往今来无数文人墨客拿自家个人生搭梅花相映照，托物抒怀，咏梅佳作精彩纷呈，传诵千年。

历史浪最早个咏梅诗是南北朝诗人陆凯个《赠范晔诗》：“折花逢驿使，寄与陇头人。江南无所有，聊赠一枝春。”不过，我老早读个辰光总归有得疑问，南北朝辰光个江南，经济浪勿是已经相当发达了嘛，勿应该“无所有”啊。人到中年之后再明白，物质浪个富庶或许可以用玉帛来承载，但勒传递情感个辰光，是勿及一枝梅来得有品位，有价值個。陆凯一落笔，就拿梅花个内在价值顶到了天花板浪。

诗仙李白一生诗作无数，杜甫称 “李白一斗诗百篇，长安市上酒家眠”。我原來當伊寫咏花诗应该勿少，但我上网去检索，勿足四十首。还有人拿芦花、雪花、烟花也当作了鲜花，葛就成為笑话了。李白桃花、杨花、荷花、菊花、杜鹃、蔷薇等儕写过，倾注感情最深个则是梅花。譬如，我最欢喜个《清溪半夜闻笛》：“羌笛梅花引，吴溪陇水情。寒山秋浦月，肠断玉关声”。唐朝个玉门关大概也没梅花个，所谓“梅花引”是只词牌。假使梅花是个具象，葛勒茫茫荒漠里辣末生头看到，是多少个寂寞孤寒啊，但是，李白用类似意识流个通感来表达，以幽幽羌笛诉诸于耳，不伤不怒，不怨不哀，勒月色里彰显了文人风骨。

还有首《与史郎中饮听黄鹤楼上吹笛》：“一为迁客去长沙，西望长安不见家。黄鹤楼中吹玉笛，江城五月落梅花”。古代诗人进则为儒，退则为道，仕途勿顺官场失意就长啸短吟一番，以泄孤愤。从文学史个角度看，倒也勿是啥坏事体。搿首诗个背景，专家个考证结论并勿一致，有人认为是李白因為永王李璘事件牵连，拨长流夜郎，路经江夏（今武汉武昌）游黄鹤楼個辰光写个。也有人认为是李白流放夜郎遇赦东归，途经江夏所作。反正，是老朋友史郎中勒江夏陪李白游览黄鹤楼。凭栏远眺，水天一色，白帆点点，鸥鹭翻飞，耳朵边頭响起悠悠个笛声，讓一路颠簸个诗人平添了绵绵愁绪，挥笔写了迭首诗。搿搭个“落梅花”，并非是梅花飘落个景色，五月份梅子快要黄了，哪能会得有梅花呢？搭梅花引一样，也是词牌名。难道李白勒边关搭黄鹤楼齊巧侪听到有以梅花命名个词牌曲？假使搿能介认为，就是勿理解浪漫主义个真谛了。总之，迭个就是意象。

李白个咏梅诗里当然有得实写个，譬如：“送君游梅湖，应见梅花发”“闻道春还未相识，走傍寒梅访消息”，但是，我还是认为伊营造个意象高于具象。

搭李白同为唐代诗坛双璧个杜甫当然也咏过梅花，来欣赏首伊个《和裴迪登蜀州东亭送客逢早梅相忆见寄》：“东阁官梅动诗兴，还如何逊在扬州。此时对雪遥相忆，送客逢春可自由。幸不折来伤岁暮，若为看去乱乡愁。江边一树垂垂发，朝夕催人自白头。”所谓“官梅”，应该是蜀州东亭官家花园里个梅花，勿是没人照看个村梅。

杜甫一生飘零，真正意义浪实现了“诗和远方”，但是，日脚过得邪气搭浆，古希腊个流浪诗人也没介苦。晚年个伊瘦骨嶙峋，须发枯疏，衣衫单薄，勒冰天雪地个场景里送客人远行，突然有一枝凌寒独秀个梅花出现勒眼門前，开得无忧无虑，勿免触景伤情。伊想：亏得呒没江南个朋友寄来折梅，否则我搿老态龙钟，繁霜染鬓個樣子撥伊映照，情何以堪。乃末，伊面对梅花个傲骨芳姿，整一整自家个衣冠，搿是中国传统知识分子个文化自觉搭仔高标风骨。