下载客户端

沪语：苏州老宅进了《都挺好》

2025-12-04 15:48

来源：澎湃新闻·澎湃号·湃客

作者：曹正文

沪语改写、讲述：朱枫

文字、语音审核：丁迪蒙

编辑：王乙其

前一抢一口气看光“东方卫视”连播个苏州生活剧《都挺好》，情节曲折而感人，老有看《人世间》个感觉。

我己经交关辰光呒没看电视剧了，胡天野地瞎编个实在是看勿下去。《都挺好》就邪气好，当然也因为勾起了我童年个记忆：我屋里个老宅居然成为了电视剧里反复出现个一只场景，埃家“食荤者”、还有大厨丁冬心勒我童年白相个园子里跑来跑去个场景就勒我眼门前。

当年，父母亲种个小树己经有得三四米高了，老井还勒海，井台浪有老老厚个包浆。眼睛一眨70年过去了，但是电视剧里个镜头还勒记忆里晃发晃发……

谢谢《都挺好》个编创搭仔演员，还有看过搿部电视剧个观众朋友。

前一抢，上海“东方卫视”每日下半日连播四集连续剧《都挺好》，申城个朋友拨吊足胃口，看得侪勿肯停下来！我难板看电视剧个，但是《都挺好》搿能介火爆，勿由得想起四年前头，苏州老朋友吴镇兄发来个微信：“侬当年住过个老宅拨拍进电视剧《都挺好》，播出之后风头浓个呀，豆瓣分一记头冲到8.5，侬看过伐？”　　

听家乡老邻舍搿能介一讲，我倒是一时头浪呆牢了，因为当时手头书稿忙，只看了片段，真个发觉我童年住过个苏州老宅肖家巷61号勒《都挺好》场景里一再出现。　　

今朝空下来，正好欣赏搿部以苏州为背景个社会生活剧。一看居然停勿下来了，人物搭故事情节一记头吸牢我了。全剧以母亲赵美兰辣末生头过世，引出一家门个矛盾勿断爆发，兄妹道里失和，姑嫂之间吵相骂，亲情搭仔欲望个冲突。呒没主见又自私、小气八腊个爷苏大强，想挑重担、又力勿从心个大儿子苏明哲，欢喜豁胖又只会啃老个二儿子苏明成，从小叛逆，自立个苏明玉，还有会得做一手好小菜个大厨石天冬。《都挺好》塑造人物性格入木三分，情节交错曲折而又扑朔迷离。

我从头看到尾巴个国产电视剧只有两部，一部《人世间》，另外部就是《都挺好》，电视剧里，平江路大儒巷到肖家巷沿河浜个一段场景，就是我童年住个老宅。我个老宅当时大门开勒肖家巷61号，后花园当年呒没门个。现在后花园破墙新开扇门。勒电视剧里，门浪多了块牌子：“食荤者”。　　

我一头看电视一头回忆，往事如烟，思绪也像煞回到了童年时代。　　

平江路原来是迓勒苏州闹市背后头个老街，搭人轧进轧出个观前街相比，搿条1600米、沿牢仔河浜建个老巷有眼冷清，陈旧斑驳个粉墙黛瓦老房子搭仔沿河浜久经风霜个石头栏杆，至今还保留有苏州老底子小巷个原汁原味个旧貌韵味。我小辰光常庄靠勒沿河浜个西厢房窗门口远远叫朝河浜里来来往往个小船望，母亲还教我念：“君到姑苏见，人家尽枕河。”朦朦胧胧还记得埃个印象。　　

电视剧里个“食荤者”，勒现实生活当中是只休闲茶馆餐厅，叫“翰尔园”。记得前两年曾经立勒翰尔园个门口头，望牢仔河浜，思绪沉浸勒“水陆并行，河街相邻”个记忆里。老底子冷清幽静个平江路，现在成为了网红时髦街，一爿又一爿小店卖个是苏州特色小吃，还有酒吧、茶室、咖啡馆搭各种纪念品小店。　

我走进平江路口大儒巷个翰尔园，进门是只老长个院子，七八平方米，进去就是幽雅个茶室，穿过茶室是只听评弹个大厅，台子浪摆仔三弦、琵琶。演员还呒没上台，听众三三两两坐勒窗门下头闲聊，我慢慢叫走到老宅前门，也就是肖家巷61号，门拨封脱了。当年父母亲种个小树已经有三四丈高，枝繁叶茂，饱经风霜个老井还勒海，井台浪有厚厚叫个包浆。　　

记得老宅当年坐南朝北，是肖家巷巷尾阿末一家，开门就是顶小石桥，叫雪糕桥，老宅有三进，进门是院子，东首里是门房间，大约摸五平方米。跨过院子是大厅，记得小辰光客厅里摆了只菩萨。后来两边搭仔房间，只留一条长廊。第二进正当中是只大院子，东面还有只小院子，是母亲养鸡个。两面是东西厢房，西厢房沿牢河浜造，窗下头就是流淌个平江河，一到夜里就灯影闪烁。东厢房里向还套了只小房间，搿是我童年个卧室。卧室外头有只四平方米个小天井，我稍为大眼就蹲勒埃面看蚂蚁勒长满青泥苔个石级浪忙忙碌碌搬场。经过厢房是第三进院子，里向有假山，还有一棵蜡梅树。后屋是两层小楼，楼下头灶披间，还有间柴房，灶披间旁边是后花园，现在院子一半还勒海，另外一半搭勒间房间，当年种个果树现在侪没了，但是前院埃棵三四层楼高个树仍旧耸立，记载勒岁月个沧桑。　　

听母亲讲，搿幢老宅是伊拉勒上世纪40年代末买个，原来个主人极吼拉吼离开苏州到香港去，要紧拿房子脱手，葛咾勿算贵，还送仔套赤刮辣新个13件老红木家生。上世纪50年代我伲搬到上海，几年之后老宅捐拨国家，先后住进去几家人家。新世纪初平江历史街区改造之后，房子就借拨商家变成平江路浪个网红打卡地，又拨《都挺好》个编导看中。电视剧爆红之后，据说翰尔园生意也一道兴隆了，除脱吃茶听评弹，还成为休憩自娱个好场化。　　