下载客户端

幸福感就是碗咸豆浆

2020-08-11 21:46

来源：澎湃新闻·澎湃号·湃客

原创李大伟海上梦叠

来源：大伟随笔

作者：李大伟

沪语改写：丁曙立

朗读：刘时医

我有个余姓朋友，股票界十几年风水勿倒，上海滩个金主，微信昵称：金爷；私人会所个名称：鑫府人家（谐音：幸福人家，又囥“三鑫” 暗典）。勿仅仅有钞票、而且热情、还有直爽，属于“小姐”们称赞个“钱多、人傻、快来”个围猎物。生于石库门，长于虹口区，东大名路浪一只鼎。江湖气重个男人邪气念旧，中年以后，夜到请客，欢喜放勒虹口个乍浦路浪，照顾开裆裤朋友就近就餐。往往请一位客人，要叫一桌隔壁弄堂个兄弟，酒足饭饱。看见伊刚出电梯，迭眼男个服务生们，勿是奔出来，而是扑上去，拉牢车门，为伊开门。伊抽出一张张“青币”（一百块大钞），一一分发，见者有份！勒美国佬个眼睛里向，是suger dada（糖爸爸）。而勒熟人圈里，搿是邪气有面子个，是衣锦还乡！勿是锦衣夜游，而是秉烛夜游。

旧上海黄金荣每日下半日去淮海东路人民路口个逍遥池，伊出手邪气大，门口头聚拢个一帮瘪三，只要伸手，一人一块。老芋头个公司也开勒淮海路浪，不过是中路，搿叫腔调。午餐常庄勒隔壁粤菜馆个福临轩，因为是日日客，所有个服务员侪认得伊，进门就大呼小叫：余老板来了！一传十、十传百，一排服务员一路喊过去，伊要个就是迭份锣鼓喧天个闹猛，伊个逻辑是：“惯铜钿要听得到响声”。一次伊早到了，大堂里空无一人，新来个服务员递上菜单，笑嘻嘻个问伊：先生，侬需要点啥？伊面孔一板：问啥！捡好个！于是一份鱼翅鲍鱼橄榄菜。

幸福除了感觉，还有指数，鱼翅鲍鱼就是老芋头个幸福指数。

以鱼翅鲍鱼待客，图个是好看，勿是好吃。我到外地，就专门拣路边摊贩，享受当地风味，所谓风味，就是老百姓吃得起个，还要吃勿厌个。比如山东泰安个火烧，一层层个油酥而片片脆，面香而微甜。出差还总要带只搪瓷碗，专门去寻角里角落窄门面个小饭店，越龌龊越好吃，否则啥人会进去？就因为好吃。最怕当地朋友请客，叫了一桌，勿管侬欢喜勿欢喜，好吃也要吃，勿好吃也要吃。勿管好勿好吃，侪要讲声“不孬”（山东话：好），“年三十死了头驴——不好也得说好”，搿叫人情世故。搿简直就是绑架嘛！如此大荤，就想到痛风糖尿病，自然大概率事件，不寒而栗，幸福指数邪气高，而幸福感觉邪气低。

勒上海，朋友来了，总是约到六艺茶馆，夜饭就是咸菜、素鸡、肉丝宽汤面，宽汤是骨头熬个。夜宵嘛、拉到霍山路吃，一付大饼、油条，再来一碗咸浆，搿家店，呒没店招，只有怀旧，油条炸得脆黄，捏勒手里，戳出老老高，半透明个样子，一拗就断，趁热吃，一咬一口，刮啦松脆，好比上海女人管老公——“一口酥”！。大饼油酥香，咸浆是豆腐花打碎，加眼紫菜、滴眼辣油、拌一眼隔夜呒没卖脱个老油条。霍山路浪做小吃生意个，勿是安徽人，就是苏北人，大饼油条摊一定是苏北人掌炉，口味兼容南北，取长补短，各取所长，风味极佳。一顿夜宵，十块洋钿左右，干个大饼、湿个豆浆、脆个油条，乐胃！老板吃得落，瘪三吃得起，请客呒没“出血”负担，吃客呒没“三高”负担。百吃不厌、百吃勿怕、百吃不败，幸福指数邪气低，幸福感觉却邪气高。迭能个吃客，一定是好朋友。而鱼翅鲍鱼，一定是生意浪个陌生人，真金白银讲假话。

霍山路个一侧，贴邻黄浦江个第一排，是十几万一平米个临江豪宅，耸立勒黄浦江湾，可以看到浦东陆家嘴个辉煌，浦西外滩个璀璨，一次陪朋友去伊面看房，中介贴牢仔耳朵啰里八嗦聒噪不已，讲尽了风月无边个妙处，朋友转身问我，我个意见是：假使要看风景，搬只小矮凳，坐勒江边，兼乘风凉，一直好坐到打瞌冲？、伤风，一分洋钿用勿着出。出仔一两千万，买套房子看风景，等于买只镀金棺材困觉，幸福指数邪气高，幸福感觉么，是大舞台对面个梨膏糖——天晓得！

幸福往往搭钞票无关。幸福是一种感觉，而勿是一叠账单式个指数。