我的童谣记忆（下）

原创 薛理勇 海上梦叠

作者：薛理勇

沪语改写：顾敏

文字修正：丁迪蒙

诵读：李国琪

音频制作：沉默是金

上海是只移民城市，宁波籍个占了老老大个比例，宁波闲话对沪语有比较大个影响，宁波人拿“莫”叫做“猫”，比方“勿要讲了”，叫做“猫”话了，“勿要动伊”叫做“猫去动其”，“覅激动”叫做“猫激动”咾啥。20世纪五六十年代，上海流行一句“猫激动，激动要进长方形个木桶”个童谣。童谣好像没啥意义，大概就是劝告对方覅激动，忒激动勿利于健康，好比是“激动得要死”，我小辰光，有些小囡还会一边奔，一边哇啦哇啦唱“毛激动，激动要进长方形个木桶”。后首来，突然之间有人讲，“猫激动”个发音搭伟大人物个姓相近，“长方形个木桶”呢，就是棺材，搿只童谣一记头变成功了咒语，是反革命口号，吓得来家长魂灵头也呒没了，迓迓叫关照小人，勿许再唱迭只童谣。搿是我个亲历亲闻，记忆犹新。

20世纪60年代初，中国进入所谓个“三年自然灾害”，物资匮乏，粮食搭日常生活用品供应严重勿足，上海人开始体验食勿果腹个苦痛，社会秩序混乱，青年失业率居高勿下，当时个失业青年美其名曰“社会青年”，伊拉等同于游荡勒社会浪个“勿良青年”，伊拉里向假使有行为稍微越轨个，女个拨叫做“三三”，后来又叫“阿三”“拉三”咾啥，男个叫“木良”，后来又叫“木壳子”、“木壳”。“三三”、“木良”常庄会做眼小偷小摸，见勿得人个事体，葛么，上海又出现了“三三木良，摸到天亮”之类个童谣，小囡也懵懵懂懂个晓得里向个意义，可能迭句有眼下作，也有点趣味，现在五六十岁以上个人应该还邪气清爽个。

当时，上海人拿公安局叫做“庙”，市公安局就是“市庙”，区公安分局就是“区庙”，比方讲，虹口公安分局就是“虹庙”；派出所叫“老派里”，警察叫“条子”，派出所民警叫“条里”；上海勒安徽白茅岭有只规模蛮大个劳监还有“劳改农场”，牢监搭劳改农场就叫“山”、“山浪”、“山浪向”；所有个犯人，勿管男女进“庙”就剃光头，于是，犯人就叫“和尚”。有趟，有个搭我同年个朋友因为勿满“条里”个横对，当场搭“条里”吵起来，拨“条里”关到“老派里”去，又拨关进“虹庙”，吃了三天“格子饭”。“格子”就是“饭格子”，类似于现在个盒饭，监牢里用饭格子盛饭菜，蹲牢监就叫“吃格子饭”，放转来之后，学会了“庙”里唱个歌，大意是：“小呀么小和尚，头光光。告别爷娘.，远离家乡，山浪去烧香。……”

歌词通俗易懂，曲调平易流畅，朗朗上口，老快就变成功了流传老广个儿歌，交关人会得唱个。当时啥人也勿晓得迭个歌曲，是啥人作词谱曲，讲个是啥个事体。想勿到， 20年后个80年代，迭首歌拨重新填词，勒电视台“联欢会”浪播出，歌词改为：“小呀么小和尚，头光光，袈裟披身浪，小木鱼敲得笃笃响，念经，做呀么做和尚。……”变成功新创作个儿歌，流传更加广、更加远了。

儿歌是童趣，是每个人童年生活个乐趣，也是成年之后美好个记忆。现在，上海家庭独生子女多，居住环境也发生了翻天覆地个变化，小囡除脱读书做功课，难板有搭邻居小囡一道白相个机会，我真个是勿晓得，现在个小朋友是勿是还有属于自家个儿歌童谣。

作者：薛理勇

诵读：李国琪

原标题：《我的童谣记忆（下）》

阅读原文